Wilhelm Von Humboldt eta Euskal Herria

liburuaren aurkezpena, Iñaki Zabaleta

Euskaldunak ezagutzera etorri diren bidaiari klasikoen artean Humboldt da seguruenik ezagunenetako bat. Zergatik etorri zen gure artera? Zer ikasi zuen hona etorrita? Galdera hauei erantzun nahi die Iñaki Zabaleta Gorrotxategik argitaratu duen liburuan eta urriaren 24an, 19:00etan San Telmo Museoan, berarekin egingo dugun solasaldian.

Wilhelm von Humboldt (1767-1835) prusiar humanista, politikari eta hizkuntzalari ezagunak giza eta gizarte zientzien inguruko obra zabal bat du eta, horren baitan, leku esanguratsu bat betetzen dute euskal nazioari eta hizkuntzari buruzko bere saiakera eta ikerketek.

Euskal Herria bisitatzen duenetik, 1799an eta 1801ean, behin eta berriz heltzen dio euskal gaiari, bereziki hurrengo hogei urteetan, baina horren emaitza ez da ageriko corpus itxi bat: argitaratutako testuak gutxi dira eta gehienak soilik zirriborroak edo zatikako estudioak. Bada honela, eta nahiz eta bere ahaleginek egitasmo konkretu bati jarraitzen dioten, ez da beti erraza bere euskal testuen arteko barne lotura antzematea eta, are gutxiago, horiek bere planteamendu filosofiko orokorrarekin eta bere ibilbide pertsonal zein intelektualarekin duten lotura ulertzea.

Hauxe da, honenbestez, idazlan honen helburua: gure artean, eta euskaraz, Humboldten euskal ikerketak ezagutzera ematea, hala nola, horien edukiak modu ordenatu edo sistematiko batean eta bere pentsamendu antropologikoarekiko erlazioan aurkeztuz.

 

Erantzun bat utzi

XHTML: Tag hauek erabil ditzakezu: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Top